A Carroucha 2

INFORMATIVO DA COMUNIDADE DE MONTES DE XUÑO.

Nº 2. DECEMBRO 2008

Aquí está o segundo número. Desta volta distribuirémolo nos seguintes lugares: Supermercado Día, Supermercado Claudio, Bar Agra 20, na de Mariño, na de Rosa de Sieira, no Camping, no Centro de Saúde, e na Igrexa. En total 8 lugares. En cada un deles deixaremos 15 follas. Alí pode ser recollido por todo aquel que queira lelo e levalo

HISTORIA DA COMUNIDADE DE MONTES DE XUÑO

En cada número da CARROUCHA iremos dando a coñecer, aos poucos, a historia da nosa Comunidade de Montes. Pasan os anos e esquécense os feitos que nos levaron a melloras que hoxe disfrutamos e que parece que viñeron da nada, pero que necesitaron do esforzo animoso de moitos veciños. Alá imos.

A Asociación de Veciños Sartaxas, que fora creada no 1976, levaba tempo teimando por recuperar o monte do común, que lle fora sustraído aos veciños polo Icona. Esta Asociación promove unha xuntanza que se celebra o 4 de xuño. de 1978. Noméase nela unha comisión presidida por José Reiriz Martínez. Esta comisión ten o cometido de solicitar ao Xurado Provincial de Montes a clasificación do monte de Xuño como Monte Veciñal en Man Común.

Pasados once meses, o día 29 de maio de 1979, unha resolución do Xurado Provincial de Montes declara clasificado o noso monte co seguinte nome: Monte Veciñal en Man Común “Sieira e Castelo” e atribúe a súa pertenza á parroquia de Xuño.

Case tres meses despois, o 26 de agosto de 1979, celébrase a Asemblea Xeral Constituínte da Comunidade. Nesa Asemblea elíxese a 1ª Xunta Rectora da mesma. O seu Presidente é Bernardo José Vila Cameán, de Vicepresidente José Calo Maneiro, coma tesoureiro Benigno Rego Ageitos, de secretario José Reiriz Martínez e están acompañados dunha longa lista de vocais.

Dende esa data ata o 1982 celebráronse varias reunións da Xunta Rectora e tamén Asembleas da Comunidade que tiñan lugar na hoxe desaparecida sala de festas A Cantaruxa. E será no 1982 cando se celebre unha importante Asemblea Xeral e mesmo as segundas eleccións. (Continuará).

PARQUE EÓLICO

As empresas concesionarias dos parques xa fixeron o pago da anualidade do 2007 e tamén a do 2008.

Polo 2007 ingresáronse 5.173,86 €(a obra comezou nos últimos meses dese ano, polo que non se cotiza todo a anualidade).

Polo 2008 cobráronse 15.979,60 € (o que corresponde coa totalidade do ano). Estes son ingresos fixos que de agora en vante terá a comunidade e que se irán actualizando coa suba do IVE anual.

XUNTANZA NA OFICINA DO DISTRITO FORESTAL EN NOIA

O sábado día 15 de novembro, reuníronse directivos da Comunidade de Montes de Xuño, a administrativa da Comunidade, un axente forestal e un técnico do distrito.

Falouse dos traballos no monte e destes dous asuntos:

Lindes con Lesón: Compróbase que nos planos de deslinde dos dous montes (Xuño e Lesón) hai total coincidencia, non existindo ningunha contradicción que poida dar lugar a dúbidas sobre os lindes actuais. O peche que se está facendo na parcela I, a que está por riba das Trabes e Cernadas, vai polo linde establecido neses planos.

Verquedoiro do Alto da Escola. Xa o tiñamos pechado por indicación do Seprona e do propio Distrito. Fixemos incluso limpeza dos arredores, pero agora hai que retirar o escombro e sanear o sitio. Para elo temos que tomar contacto co Departamento de Calidade Ambiental da Xunta de Galicia. Aproveitamos para lembrar a todos que está totalmente prohibido botar lixo ou escombro no monte, sexa cal sexa o lugar.

OBRAS REALIZADAS NO MONTE

• Limpeza mecánica e manual da entrada e arredores do verquedoiro do Alto da Escola, incluíndo o desbroce das dúas beiras da pista que baixa cara O Outón


• Reparouse a pista que vai da Fonte Salgueira á Lagüela.


• Fíxose un cortalumes entre a parcela propiedade da empresa Norfor (os da eucalipteira) e a nosa parcela de Vistipoi.


• Estanse a sinalizar os marcos que delimitan as lindes do noso monte.


• Xa vai bastante avanzada a obra do peche da parcela I (Trabes e Cernadas). Nesta parcela meterase o gando e completará así a obra xa iniciada cos peches de Picoutos e Vistipoi. Lembramos que o uso destas parcelas está regulado por un acordo que xa foi aprobado pola asemblea de comuneiros.

MANCOMUNIDADE DE MONTES VECIÑAIS EN MAN COMÚN

Fíxose a limpeza de 20 hectáreas (416 ferrados) na parcela da Barcia-Aradiza. Este traballo formou parte dun grupo de actuacións que foron solicitadas e realizadas pola Mancomunidade en montes de varias comunidades.

CONVOCATORIA DE ASEMBLEA XERAL PARA O 8 DE DECEMBRO

Mandouse unha convocatoria a todas as casas da parroquia, sexan ou non sexan comuneiros. Polo reverso da folla da convocatoria hai uns impresos destinados a poder darse de alta, darse de baixa ou mesmo cambiar de comuneiro titular.

É unha ocasión para que todos os que aínda non son comuneiros poidan facelo cubrindo a solicitude. Xa sabedes que todo veciño ten dereito a ser comuneiro, pero debe solicitalo por escrito. A legalidade e a necesidade de manter o quorum nas decisións da asemblea obríganos a facelo así.

A Carroucha 1

INFORMATIVO DA COMUNIDADE DE MONTES DE XUÑO.

Nº 1. SETEMBRO 2008

“A Carroucha” é o nome da folla informativa que a Comunidade de Montes pon agora en marcha. A intención é que os veciños vaian sabendo da vida e traballos da Comunidade.

Neste primeiro número imos facer un envío a cada casa da parroquia para dármonos a coñecer. Nos seguintes números distribuiremos varios exemplares nos lugares de paso máis frecuentes: tendas, farmacia, Caixa, Centro de Saúde, bares, igrexa. Alí pode ser recollido por todo aquel que queira lelo e levalo. Facémolo así porque o custe de fotocopia e envío a cada casa da parroquia resulta excesivo (80 € por cada edición).

Para poder manter a folla dentro dun gasto aceptable pensamos tamén en introducir propaganda de empresas e negocios de veciños da parroquia. Estes anuncios terán un custe de 3 €. Todos os que queiran anunciarse poden poñerse en contacto coa oficina da Comunidade, da que máis adiante falaremos.

Tamén queremos ofrecer espazo na folla informativa a todos aqueles veciños que desexen facer algún anuncio de interese (compra ou venda dunha leira, dunha maquinaria, un aluguer de terras ou de casa, ofertas de traballo...). O mesmo para as organizacións da parroquia que estimen oportuno dar algún aviso ou informe (fútbol, veciños, ANPA, catequese, comisión de festas, asociación de gandeiros, cazadores...).

Esta folla informativa nace na Comunidade de Montes, pero quere ser de todos
Novas na xestión da Comunidade

Na Asemblea celebrada o día 29 de xuño do 2008 decidiuse contratar unha persoa para axudar a levar a xestión. Esta persoa xa está traballando no local da Comunidade, enriba do Centro de Saúde, os venres de 9:00 a 13.00. No caso de que un venres sexa festivo estará os martes de 16:00 a 20:00 horas.

A Comunidade habilitou unha oficina para atender aos comuneiros (solicitudes, autorizacións, planos, enviar e recibir fax...). O número de teléfono-fax é o: 981-769285.

Tamén se está a ofrecer axuda á Sociedade Deportiva de Xuño na posta ao día do listado de socios. Fóra, a carón da porta da entrada, haberá un taboleiro de anuncios para as informacións.

AVISO DA COMISIÓN DE FESTAS

Venres 26 de setembro, a partir das 11.00 da noite festa da véspera de San Miguel.

A actual Comisión de Festas despídese para sempre e anima a outros veciños da parroquia a collelas.

Composición da nova Xunta Rectora

Presidente:

José Manuel Silva Ferreira (Pepe do Curro)

Vicepresidente:

Juan Jesús Pérez Santos (Juan Jesús do Bicho)

Secretaria:

Ana Lijó Santos (Ana do Río)

Tesoureiro:

Jesús Rodríguez Santos (Suso)

Vocais:

José M. Hermo Casais (José de Delfina)

Monserrat Fernández González (Montse do Cortiño)

Carlos Javier Carnota Sampedro (Carlos do Pradomonte)

Obras realizadas no monte

Plantouse pino no lugar da Pedra Deitada (parte sur do Castelo).

No lugar da Fontesalgueira (parte oeste do Castelo) púxose pino e frondosa (carballos, bidueiras,) Tamén se fixo limpeza na plantación de pinos alí existente.

Fíxose ademais roza manual do mato na parte do monte que testa coas casas do Campo da Batalla.

Por riba de Pedras Altas, a un lado e outro da pista, fíxose tamén roza e limpeza. Por frente da casa da Belga repobouse con frondosa.

No lugar do Pradomonte tamén se rozou o monte e plantáronse pinos. Utilizouse para elo unha das parcelas do pastizal, a que tiña un chan máis pobre para o uso gandeiro. As outras dúas parcelas continúan e están sendo explotadas por Carlos do Pradomente que ten alí gando e que asinou para elo un contrato de cesión coa comunidade.

Así mesmo rozouse o monte de Vistipoi e fíxose selección de planta en Sieira, por riba de Guiandón, e no Alto da Escola.

Estanse a reparar tres pistas, unha a de Fontesalgueira, que arrinca da comarcal 550, por riba de Parada e morre no Alto da Escola; outra máis pequena que arrinca do alto do Curro e atravesa o monte para desembocar tamén no Alto da Escola; e a terceira que vai de Campolongo a Balteiro.

Tamén están rematados dous peches para gando: o dos Picoutos e o de Vistipoi. Xa hai gando dentro. Os gandeiros que teñen alí cabezas son os integrantes da asociación gandeira “Curro das Traves”, con que a comunidade tamén ten asinado un contrato de cesión. Os gandeiros da parroquia integrantes desta asociación son Ricardo do Río, Os do Cortiño, e os de Tomé.

Problemas nas conduccións de auga

Con motivo das obras que o distrito forestal está a facer no noso monte, (rozas, plantacións, pistas...) romperon varias das conduccións que dan servizo ás casas dos veciños.

Cómpre poñer atención porque este aviso é moi importante. Por esta vez repararanse todos os destragos sen custe ningún para os usuarios, pero de aquí en vante soamente se repararán aquelas conduccións que estean debidamente sinalizadas e colocadas coa profundidade que marca a lei. (Este problema non é novo, xa se falou del nunha asemblea celebrada o día 19 de outubro do ano 2000).

A sinalización debe facerse de 50 en 50 metros con algunha marca de color. E se é posible entregar un plano de por onde vai a conducción, pois aínda mellor. (Así o fixeron xa os usuarios de Fontesalgueira e do Rego dos Cubeliños). Para este traballo de levantar o plano os comuneiros poden contar cos servizos do Técnico da Mancomunidade.

Todos debemos facer un esforzo e entender que a Comunidade non se pode responsabilizar dunhas conduccións que van polo seu monte e das que nin se lle informou da súa existencia.